Kung ako’y mamamatay ngayon

Kung ako'y mamamatay ngayon,

Hayaan mong malanghap ko sa kahuli-hulihang pagkakataon ang usok ng Maynila

Mairita't marindi sa nakabibinging pitpitan ng mga sasakyan at tsismisan ng mga kapitbahay

Taasan ng dugo sa patuloy na pagbulusok pababa ng mahal kong mundo

 

Kung ako'y mamamatay ngayon,

Hayaan mong salubungin ko ang araw ng luha at ang gabi ng kawalang pag-asa

Lunurin sa alak ang tiyan at sunugin ang baga sa usok

Patayin ang aking kamusmusan

 

Kung ako'y mamamatay ngayon,

Hayaan mo ako.

 

Dahil ngayon na ang ngayon na iyon.

Ang ngayon na kanina'y kinabukasan pa at sa ilang paggalaw ng kamay ay magiging kahapon din

Mamamatay na ako at iiwan ang lahat ng karungisan at kagaanan ng aking kabataan

At sa aking pagyao'y tangan ko ang mga alaalang ito ng nakaraan

 

Sa aking pagkamatay, bubungad ang bagong mundo.

Mas marahas at mas masalimuot.

Handa na ba ako?

Walang pakialam ang oras

 

At sa bagong mundong ito, mas marahas at mas masalimuot,

Hayaan mo akong umasang hindi na malanghap ang usok ng Maynila

Makakita ng kapayapaan sa nakabibinging pitpitan ng mga sasakyan at tsismisan ng mga kapitbahay

Ipanalanging umunlad ang mahal kong bayan

Aasang sa pagsalubong sa araw ay ngiti ang bitbit na tatagal hanggang sa takipsilim

At sa dilim ng gabi ay makikita ang kagandahan ng liwanag ng buwan

 

Sa aking pagpanaw, mamumukadkad ang mahalimuyak na samyong mula sa bagong mundo

Mas marahas at mas masalimuot.